Showing posts with label India. Show all posts
Showing posts with label India. Show all posts

Tuesday, January 1, 2019

تاج محل ثانی کی مختصر تاریخ

فیض الحسن قادری کیسر کلاں، ضلع بلند شہر، اتر پردیش، بھارت کے ریٹائرڈ پوسٹ ماسٹر تھے۔

انھیں اپنی بیوی تَجَمُّلی بیگم سے بہت محبت تھی۔ تجملی بیگم گلے کے کینسر کی وجہ سے دسمبر 2010ء میں فوت ہو گئیں۔

فیض الحسن قادری نے اپنی محبوب بیوی سے اپنی محبت کے اظہار کے لیے ان کی قبر پر "تاج محل ثانی" بنوایا۔ یہ تاج محل ثانی انھوں نے بستی میں اپنی زمین پر بنوایا۔

بیوی کی محبت میں انھوں نے اپنی زمین کا باقی حصہ بستی کی بچیوں کو تعلیم دینے کے لیے سکول تعمیر کرنے کی غرض سے وقف کر دیا۔

بچیوں کا یہ سکول "تاج محل ثانی" کے پاس ہی تعمیر ہو چکا ہے۔

تاج محل ثانی اور بچیوں کے سکول کی تعمیر کے لیے زمین وقف کرنے کی وجہ سے معروف و مشہور ہو جانے والے فیض الحسن 8 نومبر 2018ء کو اپنے گھر کے پاس چہل قدمی کر رہے تھے کہ کسی نا معلوم شخص نے انھیں موٹر بائیک سے ٹکر مار دی۔ وہ شدید زخمی ہو گئے۔ انھیں پہلے بستی میں طبی امداد دی گئی اور بعد میں بہتر علاج کے لیے علی گڑھ کے ہسپتال لے جایا گیا لیکن وہ صحت یاب نہیں ہو سکے اور 9 نومبر 2018ء کو وفات پا گئے۔

2014ء میں تاج محل ثانی کی تعمیر کے دوران فیض الحسن قادری کے پاس پیسے ختم ہو گئے تھے۔ وہ تاج محل ثانی تعمیر کروانے کی وجہ سے بہت مشہور ہو چکے تھے۔ ان کی شہرت کی وجہ سے وزیرِ اعلیٰ اکھیلیش یادو نے انھیں ملاقات کے لیے لکھنؤ بلایا اور تاج محل ثانی کی تعمیر مکمل کرنے کے لیے حکومت کی طرف سے مالی مدد کی پیش کش کی۔

فیض الحسن قادری نے ان کی پیش کش قبول نہیں کی۔ انھوں نے کہا وہ چاہتے ہیں کہ حکومت اس رقم سے گاؤں کی بچیوں کے لیے سکول تعمیر کروا دے جس کے لیے وہ چار بیگھہ زمین بِلا قیمت دیں گے۔

اس کے بعد تاج محل ثانی کی تعمیر اس طرح مکمل ہوئی کہ انھوں نے اپنی پینشن کی رقم اس کارِ محبت پر خرچ کر دی۔

Wednesday, December 12, 2018

آپ ظالمانہ، استحصالی نظام تبدیل کر سکتے ہیں

سب کہتے ہیں نظام خراب ہے۔ سب کہتے ہیں نظام اتنا خراب ہے کہ اسے تبدیل کرنا ہو گا۔

نظام کیسے تبدیل ہو گا؟

علاقائی منظر نامہ:

ہم دیکھتے ہیں کہ جنوبی ایشیا کے سب سے بڑے ملک اور دنیا کی سب سے بڑی جمہوریہ کہلوانے والے اور علاقائی سپر پاور بننے کےجنون میں مبتلا ملک بھارت کے عوام کی حالت انتہائی خراب ہے۔ ہندو جنونی اپنے ہی ملک کے شہریوں کو گاؤ رکھشا اور نفرت و وحشت پر مبنی دوسرے لایعنی بہانوں سے سرِ عام تشدد کر کے قتل کر رہے ہیں، بھارت کا عدالتوں، پولیس، تعلیم اور صحت کا نظام امیر بھارتیوں کے لیے بہترین جب کہ عوام کے لیے بد ترین ہے۔

بھارت میں تو کمیونسٹ پارٹیاں 1947ء ہی سے کافی طاقت ور رہی ہیں۔ اس کے باوجود بھارت کا نظام، جو پاکستان سے ہزار ہا گنا ظالمانہ و عوام دشمن ہے۔ بھارت جیسے ملک میں تبدیلی نہیں آ سکی (نہ ہی اگلے ہزار سال تک آئے گی)۔

ہمارے ملک کا خراب نظام:

ہمارے ملک میں تو چند ایک حقیقی انقلابی اہلِ علم و فکر کے سوا سارے انقلابی شاعر، ادیب، صحافی، کالم ںویس، اینکر، پروفیسر و غیر پروفیسر دانشور اور سیاست دان وغیرہ جعلی تھے اور ہیں۔ اس لیے یہاں نظام تبدیل ہونا ممکن ہی نہیں۔

وہ حقیقت جس کا علم ہمارے کسی بھی پروفیسر و غیر پروفیسر دانشور، کالم نویس، اینکر، اینالسٹ، سیاست دان اور جعلی انقلابی کو پتا ہی نہیں:

ہم عوام کو یہ تلخ ترین حقیقت مان لینا چاہیے کہ یہ نظام تبدیل نہیں ہو سکتا کیوں کہ دوسری عالمی جنگ کے بعد تاریخ کے ذہین ترین لوگوں نے یہ نظام چلایا۔

اب جب کہ سرد جنگ کے خاتمے کے بعد سے دنیا کا سیاسی، سماجی اور معاشی نظام تبدیل کیا جا رہا ہے تو ہمارے سارے دانش وروں، اینکروں، کالم نویسوں اور جعلی انقلابیوں کو اس کا پتا ہی نہیں۔ اس کا ثبوت ان کے ٹی وی پروگرام، کالم، کتابیں وغیرہ ہیں۔

اس نظام کی ایک ماننے والا پہلو:

بہرحال یہ حقیقت ہے کہ اسی نظام کے مطابق چلنے والے بہت سے ملکوں میں طبقۂ اشرافیہ ۔۔۔۔۔ بورژوا ۔۔۔۔۔ کے علاوہ عوام ۔۔۔۔ پرولتاریہ ۔۔۔۔ کے حالات بھی بہتر ہیں۔ کیسے ہیں؟ یہ ہمیں جاننے کی کوشش کرنا چاہیے اور اپنے ملک میں مثبت کام کرنا چاہیئیں۔

پاکستان میں ظالمانہ، استحصالی نظام تبدیل کرنے کا طریقہ:

سب سے آسان اور قابلِ عمل طریقہ یہ ہے کہ ہم اپنے خاندان، برادری، پڑوس اور حلقۂ احباب یعنی دوستوں میں موجود بیواؤں، یتیموں، غریبوں، بیماروں، معذوروں، بے روزگاروں اور کسی بھی اعتبار سے مصیبت زدہ لوگوں کی ۔۔۔۔۔ جو ہمارے ہی جیسے انسان ہیں ۔۔۔۔۔ مدد کریں۔

اپنے محلے کے دکان داروں کو مہذب انداز میں سمجھائیں کہ ملاوٹ والی اور درجہ دوم یعنی سب سٹینڈرڈ چیزیں نہ بیچیں۔

محلے کے میڈیکل سٹور والوں سے کہیں کہ جعلی اور غیر معیاری کمپنیوں کی دوائیاں نہ بیچیں۔

ہر گلی میں ایک لائیبریری بنائیں جہاں کتابوں کے ساتھ سائنسی ڈی وی ڈیز بھی ہوں، معلوماتی ڈوکیومینٹری فلموں کی ڈی وی ڈیز بھی ہوں، کھیلوں کی ڈی وی ڈیز ہوں جن میں سائنسی، علمی تھیوریز کھیل کھیل میں سکھائی گئی ہیں۔

ایک اہم کام:

ہمیں چاہیے کہ اپنے بچوں، بچیوں کو انتہائی غیر معیاری سرکاری و نجی سکولوں، کالجوں اور یونی ورسٹیوں میں تعلیم دلوانے کے نام پر اپنی محنت کی ۔۔۔۔۔ یا حرام کی ۔۔۔۔۔ کمائی ضائع کرنے کی بجائے انھیں معیاری تعلیم دلوائیں۔

اس سے بھی اہم کام:

ہمارے لیے یہ بھی لازمی ہے کہ اپنے بیٹے، بیٹی کو ہنر ضرور سکھائیں۔ یہ ہنر کوئی بھی ہو سکتا ہے۔ ہنر سیکھنا نہایت آسان ہوتا ہے۔

ہم بچوں کو ہنر سکھانا لازمی کیوں کہ رہے ہیں:

یہ عاجز اس لیے ہنر سکھانے کو لازمی قرار دے رہا ہے کہ ہنر مند لڑکے، لڑکیاں بڑے ہو کر نا صرف بے روزگاری سے بچ جاتے ہیں بل کہ اپنے گھر، محلے اور معاشرے میں مثبت کردار ادا کرتے ہیں۔

ہنر مند انسان مسائل پیدا کرنے یا انھیں پیچیدہ بنانے کی بجائے مسائل حل کرنے والا انسان ہوتا ہے۔ آپ اپنے گر و پیش دیکھیے۔ آپ جان لیں گے کہ ہم نے حقیقت بیان کی ہے۔

Saturday, December 1, 2018

جنرل بپن کے پاکستان سے سیکولر سٹیٹ بننے کے مطالبے سے بھارت کا سب سے اہم راز فاش

بھارت کی فوج کے سربراہ کا مطالبہ مضحکہ خیز تو ہے ہی، اس مطالبے سے بھارتی سیاست کا سب سے اہم راز بھی فاش ہو گیا ہے۔

بھارت مقبوضہ کشمیر میں بد ترین مظالم کر رہا ہے اور پوری دنیا اسے برا اور ظالم مانتی ہے۔ اسے اپنے اس انتہائی منفی تاثر کی وجہ سے دنیا کے ترقی یافتہ غالب ملکوں سے اپنے مفادات کے حصول کے لیے غیر معمولی سفارتی محنت کرنا پڑتی ہے اور کچھ لینے کے لیے بہت کچھ دینا پڑتا ہے۔

اس وقت بھی مقبوضہ کشمیر اور دوسرے علاقوں میں جبر و استبداد اور مظالم نیز اقلیتوں کا جینا نا ممکن بنا دینے کی وجہ سے بھارت انتہائی زیادہ عالمی دباؤ میں ہے۔

بھارت کے نام نہاد منتخب وزیرِ اعظم کی بجائے بھارتی فوج کے سربراہ کا پاکستان سے اس طرح مطالبہ کرنے سے بھارت کا سب سے پوشیدہ راز فاش ہو گیا ہے اور اُس بھونڈے ناٹک کا اختتام ہو گیا ہے، جو ہمارے ملک کے اجہل اور کاذب پروفیسر و غیر پروفیسر دانش وَروں، کالم نویسوں اور اینکروں وغیرہ نے بھی رچایا ہوا تھا، یعنی یہ کہ بھارت میں سویلین سیاست دانوں کا غلبہ ہے، ملک چلانے میں بھارتی افواج اور بھارتی افواج کے جرنیل کوئی کردار ادا نہیں کرتے اور بھارتی سیاست داں آزادانہ فیصلے کرتے ہیں۔

جنرل بپن نے اپنے انٹرویو میں پاکستان سے مطالبہ کر کے یہ راز فاش کر دیا کہ حقیقت میں بھارت پر بھارتی افواج اور جرنیلوں کا راج ہے۔

Wednesday, June 6, 2018

بھارت: زنا بالجبر کی شکار مسلم بچی سے کسی کو ہمدردی نہیں

بھارت: زنا بالجبر کی شکار مسلم بچی سے کسی کو ہمدردی نہیں

جیفری جیٹلمین

آٹھ سالہ بچی سے کسی کو ہمدردی نہیں تھی۔ یہ ایسے تھا جیسے اسے انسان ہی نہ سمجھا جا رہا ہو، جیسے اس کی زندگی سوائے ایک شکار کے کوئی حیثیت نہیں رکھتی ہو۔ پولیس کے تفتیش کاروں کا کہنا ہے کہ ہندو نوجوانوں کے ایک ٹولے نے اس کا انتخاب بطورِ خاص ایسا پیغام بھیجنے کے لیے کیا تھا جو اس بچی کی مسلمان خانہ بدوش قوم میں دہشت پھیلا دے۔ انھوں نے باقاعدہ منصوبہ بنا کر اسے ایک چراگاہ سے اغوا کیا تھا، نشہ طاری کر دینے والی چیزیں اس کے حلق میں ٹھونسی تھیں اور اسے ایک مندر میں تین دن مقید رکھا تھا، جہاں انھوں نے اسے مارا پیٹا، اس کے ساتھ زنا بالجبر کیا اور آخرِ کار اس کا گلا دبا کر موت کے گھاٹ اتار دیا تھا۔ اس کا قد محض ساڑھے تین فٹ تھا اور وہ اپنا دفاع کرنے کے قابل بالکل نہیں تھی۔ جہاں بھارت کے مختلف شہروں اور بین الاقوامی سطح پر غصہ بھرے احتجاجی مظاہرے ہوئے وہاں جموں و کشمیر کی اس بستی رسانا میں، جہاں اس بچی کو قتل کیا گیا تھا، موڈ مختلف ہے۔ رسانا ایک چھوٹی سی بستی ہے۔ اس میں کُل بیس گھر ہیں اور اس کے ایک سِرے سے دوسرے تک پیدل جانے میں صرف پانچ منٹ لگتے ہیں۔ خشک، خراشیں ڈالنے والی گندم کے کھیتوں سے، جن سے گائے کے گوبر کی بو آ رہی ہے،اور نیچی بیرونی دیواروں والے چھوٹی اینٹوں کے مکانات سے آگے جائیں تو آخرِ کار آپ ایک گلابی رنگ کے مندر تک پہنچ جاتے ہیں، جس پر اب قفل پڑا ہے۔ یہاں نہ تو شرمندگی ہے اور نہ ہی ہمدردی۔ ہندو اکثریت والی اس بستی کے چند لوگ ہی اس غیر انسانی جرم یا اس حقیقت کے بارے میں بات کر رہے ہیں کہ صدمے کے شکار لڑکی کے ماں باپ بستی سے بھاگ چکے ہیں۔ انھیں اپنی بیٹی کی لاش اپنے گھر کے نزدیک دفنانے سے روک دیا گیا تھا، اس لیے اِس گھرانے کو اُس کی لاش اپنے ساتھ لے جانا پڑی۔
اس کی بجائے آپ ایسی باتیں سنیں گے: ہماری زمین اور ان کی زمین۔ ہم اور وہ۔
نزدیکی بستی کے ایک بھاگ مَل نامی بوڑھے نے کہا، ’’یہ ہندووں کی ہمت توڑنے کی بڑی سازش ہے۔‘‘ بھاگ مل کو اصرار تھا کہ بچی کی ہلاکت کے الزام میں گرفتار کیے جانے والے آٹھ آدمیوں کو بلاوجہ پکڑا گیا ہے۔ اس سے پوچھا گیا کہ اس سازش کے پیچھے کون ہے؟ تو اس نے غصہ بھری آواز میں سرگوشی کرتے ہوئے کہا، ’’علیٰحدگی پسند۔‘‘ اس کا اشارہ ریاست جموں و کشمیر کے دوسرے حصے کے مسلمانوں کی طرف تھا جو بھارت سے آزادی چاہتے ہیں۔ بہت سے بھارتیوں کو امید تھی کہ 2012ء میں دہلی میں ایک بس میں ایک نوجوان لڑکی کے ساتھ اجتماعی زنا بالجبر کے واقعے کے بعد صورتِ حال تبدیل ہو جائے گی لیکن ایسا بالکل نہیں ہوا۔ چند قوانین سخت بنا دیے گئے تھے اور اب بھارتی حکومت چاہتی ہے کہ چھوٹی بچیوں کے ساتھ زنا بالجبر کرنے والوں کو سزائے موت دی جائے لیکن زنا بالجبر کے مقدمات میں سزا دینے کی شرح بہت کم ہے جب کہ درجنوں بھارتی سیاست دان جنسی جرائم کے الزامات کے باوجود منتخب ہو چکے ہیں۔
بھارت مذہب، نسل اور سیاسی خطوط پر اتنا زیادہ منقسم ملک ہے کہ اس قدر ہول ناک جرم کو بھی فوراًسیاست کے رنگ میں رنگ دیا گیا ہے۔بہت سے ہندو اہلِ علم انتہا پسندی کے عروج کو اس کا الزام دیتے ہیں اور کہتے ہیں کہ انھیں مسلمانوں کے خلاف کھلی چھوٹ دے دی گئی ہے خواہ وہ کہیں بھی ہوں اور کتنے کم عمر ہی کیوں نہ ہوں۔ بچی کی ہلاکت کے بعد وزیرِ اعظم نریندر مودی پر، جن کی جماعت کی جڑیں ہندو قوم پرستی میں ہیں، اس جرم کی مذمت فوراً نہ کرنے پر سخت تنقید کی گئی۔ انھوں نے اس واقعے اور زنا بالجبر کے ایک اور حالیہ واقعے پر تب بات کی جب ہر طرف احتجاج برپا ہوا۔ انھوں نے کہا، ’’ہماری بیٹیوں کو انصاف ضرور ملے گا۔‘‘ ان کی جماعت کے عہدے داروں نے اس بات سے انکار کیا کہ انھوں نے دونوں واقعات کے حوالے سے غلط طرزِ عمل اپنایا تھا۔ انھوں نے یہ بات بھی تسلیم نہیں کی کہ ان کی سیاست نے بھارت کو ایک دوسرے کے شدید مخالف دھڑوں میں تقسیم کر دیا ہے۔ انھوں نے کہا کہ بچی کی ہلاکت کے بعد وہ تو صرف ’’لوگوں کا غصہ ٹھنڈا کر رہے تھے۔‘‘ بہرحال مودی کی جماعت کے بعض اعلیٰ عہدے دار بچی کے قتل کے معاملے میں ملوث افراد کا شدومد سے دفاع کر رہے ہیں۔ تجزیہ کار کہتے ہیں کہ کئی سال سے بی جے پی کا رویہ ایسا ہی چلا آ رہا ہے۔ تیروواننتا پورم کے سینٹر فار ڈیویلپمنٹ سٹڈیز سے تعلق رکھنے والی تاریخ داں جے دِیویکانے کہا، ’’نوجوانوں کو پڑھایا گیا ہے کہ مسلمان اس قوم پر دھبہ ہیں ۔۔۔ ان کے ساتھ جو کرنا چاہتے ہو، کرو۔‘‘ انھوں نے وزیرِ اعظم نریندر مودی کی جماعت بھارتیہ جنتا پارٹی (بی جے پی) اور ان کے اتحادیوں پر الزام لگایا کہ انھوں نے ’’ہندو مذہب کو ہتھیار بنا لیا ہے۔‘‘ انھوں نے ایک اور واقعے کا بھی ذکر کیا جس میں ایک ہندو جنونی نے کلہاڑی کے وار کر کے ایک مسلمان کو قتل کر دیا تھا۔ قاتل نے اس کی دہشت ناک ویڈیو سوشل میڈیا پر پوسٹ کی، جو بہت بڑی تعدا میں شیئر کی گئی۔قاتل ہندو انتہا پسندوں میں راتوں رات مشہور ہو گیا۔ جہاں بہت سے بھارتیوں کو اس واقعے پر افسوس ہوا، وہاں بے شمار بھارتی اس پر خوش ہوئے۔ ہندو انتہا پسندوں کے ہول ناک جرائم کی فہرست طویل ہے۔ گائے لے جانے والے مسلمانوں کو ہندووں کے ہجوم نے تشدد کر کے ہلاک کر ڈالا۔ ایک مسلمان لڑکے کو ٹرین میں خنجر گھونپ دیا گیا۔ ابھی پچھلے ہی ہفتے پولیس نے کہا کہ نریندر مودی کی سیاسی جماعت کے ایک نوجوان راہنما نے شیخی بگھارتے ہوئے بتایا کہ اس نے روہنگیا مسلمان پناہ گزینوں کے سینکڑوں مکانات جلا کر خاکستر کر ڈالے۔ ایک حالیہ تجزیے کے مطابق نریندر مودی کی آنکھوں کے سامنے نفرت کی وجہ سے کیے جانے والے جرائم میں بہت زیادہ اضافہ ہو گیا ہے۔ بچی کا قتل اسی عام ہو جانے والی نفرت کا ہی نتیجہ ہے۔ زیادہ تر مسلمان اور نچلی ذات کے ہندو نفرت کا نشانہ بنتے ہیں۔ رسانا میں موجود سرکاری اہل کاردونوں طرف کا غصہ ٹھنڈا کرنے کی کوششیں کر رہے ہیں۔
بھارت کے بیش تر علاقوں میں مختلف مذاہب کے لوگ رہتے ہیں۔ اس علاقے میں بھی مسلمان اور ہندو ساتھ ساتھ رہتے ہیں اور عموماً ایک دوسرے کے ساتھ دوستانہ انداز اپنائے رکھتے ہیں تا وقتے کہ کوئی انھیں اکسا نہ دے۔ آٹھ سالہ بچی سے زنا اور اسے قتل کرنے کے مقدمے میں عدالت میں سب سے پہلے ہندو وکیلوں نے پولیس کے سپاہیوں کے ساتھ ہاتھا پائی کی۔ اس کے بعد احتجاج در احتجاج کا سلسلہ شروع ہو گیا۔ نریندر مودی کی جماعت کے کارکنوں اور عہدہ داروں نے جلوس نکالے اور توڑ پھوڑ کی۔ ان کا کہنا تھا کہ مشتبہ افراد کو اس مقدمے میں پھنسایا گیا ہے اور وہ بے قصور ہیں۔ درجنوں ہندو عورتیں بھی ان کے احتجاجی جلوس میں شریک ہوئی تھیں۔ ان ہندو عورتوں نے بھوک ہڑتال کر دی۔ ان کا کہنا تھا کہ وہ تادمِ مرگ بھوک ہڑتال کریں گی۔ ان میں سے کئی ہندو عورتوں نے ایسا ہی کیا اور قریب المرگ ہونے پر انھیں ہسپتالوں میں داخل کروایا گیا۔ احتجاج کرنے والے ہندو ایک سی باتیں کر رہے ہیں۔ وہ ریاستی حکومت پر الزام لگا رہے ہیں کہ وہ مسلمانوں کے ہاتھوں میں کھیل رہی ہے۔ ان کا مطالبہ ہے کہ ریاستی پولیس کی بجائے سینٹرل بیورو آف انویسٹی گیشن (سی بی آئی) تفتیش کرے۔ سینٹرل بیورو آف انویسٹی گیشن (سی بی آئی) ایک وفاقی ایجنسی ہے جس کے بارے میں سب کہتے ہیں کہ وہ نریندر مودی کی جماعت کے اشاروں پر کام کرتی ہے۔ دوسری طرف ریاست کے دوسرے حصوں میں مسلمانوں نے احتجاجی جلوس نکالے۔ پولیس نے انھیں روکا تو ان کا پولیس کے ساتھ تصادم ہو گیا۔ ان کا مطالبہ تھا کہ مشتبہ افراد کو پھانسی دی جائے۔ اگرچہ ریاستِ جموں و کشمیر کا زیادہ تر انتظام بھارت کے ہاتھ میں ہے لیکن یہ پاکستان کے ساتھ عشروں سے جاری خوں ریز تنازع کا باعث چلی آ رہی ہے۔ ریاست کی حکومت پہلے ہی حالات و واقعات سے گھبرائی ہوئی ہے۔ اسے وادئ کشمیر کے عوام کی لامختتم شورش اور بھارتی سکیورٹی فورسز کے شدید ترین کریک ڈاؤن کا سامنا ہے۔ یہ حکومت محض سیاسی مقاصد سے بنائے گئے ایک عجیب و غریب اتحاد کی حکومت ہے جس میں خودمختاری کے لیے کام کرنے والی مسلمانوں کی ایک جماعت اور نریندر مودی کی دائیں بازو کی ہندو جماعت بھارتیہ جنتا پارٹی، جسے بی جے پی کہا جاتاہے، شامل ہیں (دونوں جماعتوں نے اتنے ووٹ حاصل نہیں کیے تھے جو حکومت بنانے کے لیے کافی ہوتے۔) اپریل کے وسط میں بی جے پی سے تعلق رکھنے والے اُن دو وزیروں کو استعفے دینے پر مجبور کر دیا گیا جنھوں نے آٹھ سالہ بچی سے زنا اور قتل کرنے میں ملوث ملزمان کے حق میں نکالے جانے والے احتجاجی جلوسوں میں شرکت کی تھی۔ اس اقدام کا مقصد کمزور سیاسی اتحاد کو بچانا تھا۔ اب بھی وہ دونوں سابق وزیر ملزموں کے حق میں نکالے جانے والے وکیلوں کے احتجاجی جلوسوں میں شریک ہو رہے ہیں۔ پورے بھارت میں، خصوصاً بڑے شہروں میں، ہر مذہب کے لوگوں نے اس جرم اور اس کے بعد ابھرنے والی تفریق کے خلاف غصے کا اظہار کیا لیکن اکسانے اور قانون کی خلاف ورزی کرنے کا سلسلہ جاری ہے۔ بھارت کے کئی اخبارات اور نیوز چینلوں کے مطابق ایک ہندو وکیل نے اس جرم کی تفتیش کرنے والے پولیس افسر کی تذلیل کی۔ اگرچہ فردِ جرم کسی ڈراؤنی فلم کے سکرپٹ کی طرح رونگٹے کھڑے کر دینے والی ہے لیکن مقامی سطح پر اس دہشت انگیز جرم کا کوئی اثر نہیں ہوا۔ بچی کے باپ نے ایک انٹرویو میں بتایا کہ 10جنوری کی شام کو گڑبڑ کے پہلے آثار نظر آئے تھے، جب پانچ گھوڑے اپنی آٹھ سالہ مالکن کے بغیر واپس آئے تھے۔ بچی کو گھوڑوں سے بہت پیار تھا۔ وہ اپنے دوپٹے کو لگام کی جگہ استعمال کرتے ہوئے ان پر لگاموں کے بغیر سواری کیا کرتی تھی۔ اسے بہت تلاش کیا گیا لیکن وہ کہیں نہ مل سکی۔ اس کے باپ نے محسوس کر لیا تھا کہ یہ کوئی بہت بڑا مسئلہ ہے۔ اس نے جلدی سے ٹارچ اٹھائی اور ہر گڑھے، کھائی، نالے اور کھیتوں میں اسے ڈھونڈا۔ وہ کہیں نہیں ملی۔ انھوں نے اسے گھر گھر تلاش کیا۔ وہ کسی بھی گھر میں نہیں ملی۔ ان کی پریشانی بڑھتی گئی۔ بہت سے دوسرے خانہ بدوش بھی ان کے ساتھ تلاش میں شامل ہو گئے۔ انھوں نے نزدیکی جنگل میں تلاش کیا اور ایک چھوٹے سے مندر تک پہنچ گئے۔ خانہ بدوشوں نے بتایا کہ مندر کے نگران نے انھیں ڈرا یا دھمکایا۔ وہ ایک سابق ریوینیو افسر ہے، جو دست شناسی، علمِ نجوم اور مستقبل بینی کے حوالے سے مشہور ہے۔ اس نے تحکم آمیز لہجے میں لڑکی کے والدین کو تسلی دی کہ فکر نہ کرو، تمھاری بچی خیریت سے ہے۔ کوئی اس کی حفاظت کر رہا ہے۔ پولیس کے مطابق ٹھیک اسی وقت اسی مندر کے نگران کی ہدایات پر عمل کرتے ہوئے نوجوان مرد مندر کے اندر بچی کے ساتھ زنا بالجبر کر رہے تھے۔ تین دن بعد انھوں نے بچی کو قتل کرنے کا فیصلہ کیا۔ تفتیش کار کہتے ہیں کہ جرم کا مقصد نسلی صفایا کے سوا کچھ نہیں تھا۔
تفتیش کاروں نے کہا کہ مندر کا نگران سانجی رام اپنے علاقے میں خانہ بدوشوں کے آنے کے باعث ان سے نفرت کرتا تھا اور اس نے انھیں وہاں سے بھگانے کی نیت سے اس جرم کا منصوبہ بنایا تھا۔ خانہ بدوشوں کا تعلق بکروال کہلائے جانے والے ایک نسلی گروپ سے ہے، جس کے اکثر لوگ مسلمان ہیں۔ وہ لوگ کئی نسلوں سے بھیڑبکریوں کے گلّوں اور گھوڑوں اور کتوں کے ساتھ پورے جموں و کشمیر کے اونچے نیچے پہاڑوں ، وادیوں میں اور سڑکوں کے کنارے کنارے پھرتے رہتے ہیں۔ وہ ہائی ویز کے نزدیک لگائے گئے اپنے رنگ برنگے خیموں اور اپنی چمک دار آنکھوں کی وجہ سے دوسروں سے الگ دکھائی دیتے ہیں۔ بکروال بزرگ کہتے ہیں کہ انھیں اپنی برادری کے لوگوں کی تعداد کا علم نہیں، شاید ان کی تعداد 200,000ہو۔اسی طرح انھیں اپنی اصل کا بھی ٹھیک سے علم نہیں۔ بعض لوگ کہتے ہیں کہ وہ کوہِ قاف سے آئے تھے اور بعض کہتے ہیں وہ افغانستان سے آئے تھے۔ ایک بکروال بزرگ طالب حسین نے کہا، ’’ہماری تاریخ کسی نے نہیں لکھی۔‘‘ بہرحال بکروال خانہ بدوشوں کے لیے زندگی بدل رہی ہے۔چند گھرانوں نے رسانا کے علاقے میں ہندو کاشت کاروں سے زمین خرید کر وہاں آباد ہونے کا فیصلہ کیا۔ انھوں نے پکی اینٹوں سے مکان تعمیر کروائے اور اپنے بچوں کو تعلیم دلوانے کا سوچا۔ یہ ان کے لیے آگے کی طرف ایک بہت بڑا قدم تھا۔ مقتول بچی کا گھرانا بھی ان گھرانوں میں شامل تھا۔ مشتعل سانجی رام کے بارے میں بستی والے کہتے ہیں کہ وہ راسخ العقیدہ ہندو اور نریندر مودی کا جوشیلا مداح تھا۔بستی کے بہت سے لوگوں نے بتایا کہ سانجی رام ہندو خانہ بدوشوں کو تو اپنی زمین کاشت کاری کے لیے بخوشی دے دیتا تھا لیکن مسلمانوں کو بالکل نہیں دیتا تھا۔ تفتیش کارکہتے ہیں کہ سانجی رام نے آٹھ سالہ بچی کو اغوا کرنے کے لیے اپنے بیٹے، بھانجے اور چند دوسرے نوجوانوں کو تیار کیا تھا۔ (بچی کا نام اس باعث لکھا نہیں جا رہا کیوں کہ ایک بھارتی عدالت نے صحافیوں کو دھمکی دی ہے کہ بچی یا اس کے گھرانے کے افراد کے بارے میں کسی بھی قسم کی معلومات افشا کیں تو انھیں جیل بھیج دیا جائے گا۔ عدالت کہتی ہے کہ اس گھرانے کی عزت محفوظ رکھنے کی غرض سے ایسا کرنا ضروری ہے حالاں کہ پولیس پہلے ہی بچی کا نام بتا چکی ہے اور سوشل میڈیا پر اس کا نام عام ہو چکا ہے۔) بچی کو قتل کرنے کے بعد اس کی لاش ایک کھائی میں پھینک دی گئی تھی۔ تفتیش کاروں نے بتایا کہ دو پولیس والوں نے، جو ہندو تھے، ثبوت و شواہد مٹا دیے۔ انھوں نے بچی کا لباس کرائم لیبارٹری بھیجے جانے سے پہلے صاف کرنے کی کوشش کی۔ انھوں نے بہانہ بنایا کہ وہ تو ڈی این اے ثبوت ڈھونڈ رہے تھے۔ انھوں نے یہ بھی کہا کہ آٹھوں مشتبہ افراد نے جرم کا اعتراف کر لیا ہے۔ رسانا کے ہندووں کو اس بات پر یقین نہیں۔ ایک دن چند ہندو بوڑھے مجھے جنگل کے سِرے پر واقع گلابی رنگ کی عمارت والے مندر میں لے گئے۔ کنکریٹ کا فرش دھو کر صاف کر دیا گیا تھا، دیواریں ہندو دیوی، دیوتاؤں کے شوخ رنگوں والے پرانے پوسٹروں سے سجائی گئی تھیں۔ مندر میں سانجی رام کے ایک معاون سریش شرما نے کہا، ’’دیکھیں، بچی کو یہاں قید نہیں کیا جا سکتا تھا۔ یہاں لوگ ہر وقت آتے جاتے رہتے ہیں۔‘‘ لیکن اس کی بات پر یقین کرنا بہت مشکل ہے۔ صرف چند ہی گھروں کے لوگ اس مندر میں آتے ہیں جب کہ بہت سے گھر ویران پڑے ہیں۔

(بشکریہ نیو یارک ٹائمز؛ انتخاب: دنیا ریسرچ سیل؛ ترجمہ: محمد احسن بٹ)

چوتھے صنعتی انقلاب کا زمانہ، میگا سٹی، یوٹوپیا اور ڈائریا

اپنے لایعنی خیالوں کی دنیا میں جینے والوں کی یوٹوپیا، میگا سِٹی، عظیم تاریخی شہر وغیرہ وغیرہ کی اس چوتھے صنعتی انقلاب کے زمانے میں، اکیسویں ...