ماں ۔۔۔۔۔ رضا سرسوی کی معروف نظم

موت کی آغوش میں جب تھک کے سو جاتی ہے ماں
تب کہیں جا کر رضا تھوڑا سُکُوں پاتی ہے ماں​

موت کی آغوش میں بھی کب سُکُوں پاتی ہے ماں
جب پریشانی میں ہوں بچّے، تڑپ جاتی ہے ماں​

جاتے جاتے پھر گلے بچّے سے ملنے کے لیے
توڑ کر بندِ کفن باہوں کو پھیلاتی ہے ماں​

روح کے رشتوں کی یہ گہرائیاں تو دیکھیے
چوٹ لگتی ہے ہمارے اور چِلّاتی ہے ماں​

بھوکا سونے ہی نہیں دیتی یتیموں کو کبھی
جانے کس کس سے کہاں سے مانگ کر لاتی ہے ماں​

ہَڈّیوں کا رَس پِلا کر اپنے دل کے چَین کو 
کتنی ہی راتوں کو خالی پیٹ سو جاتی ہے ماں​

جب کھلونے کو مچلتا ہے کوئی غربت کا پھول
آنسووں کے ساز پر بچے کو بہلاتی ہے ماں​

مار دیتی ہے تمان٘چہ گر کبھی جذبات میں
چومتی ہے لب کبھی رخسار سہلاتی ہے ماں​

کب ضرورت ہو مِری بچے کو اتنا سوچ کر
جاگتی رہتی ہے ممتا اور سو جاتی ہے ماں​

گھر سے جب پردیس کو جاتا ہے گودی کا پلا
ہاتھ میں قرآں لیے آنگن میں آ جاتی ہے ماں​

دے کے بچے کو ضمانت میں رضائے پاک کی 
سامنا جب تک رہے ہاتھوں کو لہراتی ہے ماں​

ایسا لگتا ہے کہ جیسے آ گئے فردوس میں
کھینچ کر باہوں میں جب سینے سے لپٹاتی ہے ماں​

دیر ہو جاتی ہے گھر آنے میں اکثر جب ہمیں 
ریت پہ مچھلی ہو جیسے ایسے گھبراتی ہے ماں​

مرتے دَم بچہ نہ آئے گھر اگر پردیس سے 
اپنی دونوں پُتلیاں چوکھٹ پہ رکھ جاتی ہے ماں​

سامنے آنکھوں کے نکلے گر جواں بیٹے کا دَم
زندگی بھر سر کو دِیواروں سے ٹکراتی ہے ماں​

شکریہ ہو ہی نہیں سکتا کبھی اُس کا ادا
مرتے مرتے بھی دعا جینے کی دے جاتی ہے ماں​

شاعر: رضا سرسوی​